ኢትዮጵያዬ የኔ ናፍቆት
ትውስ አልሽኝ እናት አለም
አውዳመቱ፣ ግርግሩ፣
ድርድሩ፣ ፉክክሩ
አንተ ትብስ
አንቺ ትብሽ
ስንባባል የኖርንበት
እረ ስንቱ ኢትዮጵያዬ
ስንቱን ላንሳ፤ ስንቱን ጥዬ
ከትዝታው፣ ከትውስታው
ልንገርሽ እናት አለም
ላጫውትሽ ኢትዮጵያዬ
በውስጤ የኖረውን
በጥቂቱ ልንገርሽ
ከታሪኬ ላካፍልሽ
ኢትዮጵያዬ ላውጋሽ
ትዝታዬን ላጫውትሽ
በአየር ክልልሽ ያለፍኩት
በሰማይሽ ያቋረጥኩት
አልረሳውም ኢትዮጵያዬ
የተሰማኝን ስሜት
የነዘረኝን ንዝረት
የኢትዮጵያ አየር ክልል
ውስጥ ነህ ቢለኝ ካርታው
ኢትዮጵያን እያለፍናት ነው
ቢለኝ ያልገባው ጎረቤቴ
በመፅሃፍ ተደብቄ
ሥራ የበዛበት ሆኜበት
እንባ እየተናነቀኝ
አንዲትም ቃል ትንፍሽ ሳልል
አለፍኩሽ እኮ ኢትዮጵያዬ::
ዛሬ ግን ኢትዮጵያዬ
አዎ ዛሬ ግን ሀገሬ
የተስፋ ስንቄን ሰንቄያለሁ
ብቅ ብዬም አይሻለሁ
የአቅሜንም ጀባ እላለሁ
ብድርሽንም እከፍላለሁ
ኢትዮጵያዬ እንገናኛለን
ዳግምም እንተያያለን
ትናንት ኢትዮጵያዊ
ዛሬም ኢትዮጵያዊ
ነገም ኢትዮጵያዊ
ሁሌም ኢትዮጵያዊ
ኩሩው ኢትዮጵያዊ
እመጣና አይሻለሁ
የአቅሜንም ጀባ እላለሁ
ቃሌንም አከብራለሁ::
(ማስታወሻነቱ በስደት ለሚኖሩ ኢትዮጵያውያን)
